السميييين

مش عارفة ليه إنهاردة افتكرت حكاية مامتي كانت حاكتهالي ... حسيت إنها قريبة قوي للي بفكر فيه بقالي مدة ... وحبيت إنكم تشاركوني تفكيري.

بعد فترة قصيرة من جواز مامتي .. الوالد طلب منها تجهز عزومة معتبرة عشان في ضيوف رجالة هيزوروه ... وبما إن ده يعتبر أول إختبار في شطارة الست الوالدة في الطبيخ وتدبير العزايم، فهي حاولت جاهدة بكل ما أوتيت من شطارة ونفس في الأكل عشان ترفع راس الوالد قدام ضيوفه .. والحقيقة تتقال مامتي بشهادة الجميع طبيخها يعجب الباشا ... المهم ... نزلت الوالده للسوق واشترت أحسن خضار وأحسن قطعية لحمة وكانت حمراااااااااا على الأخر .. ووصت الجزار بإنها مش عاوزة أي فتفوته دهن فيها لزوم (الألااااجه وأكل الذوات) ودفعت الفرق طبعاً.
ربطت منديلها على راسها وشمرت كمامها ولبست مريلة المطبخ .. وحبت تزود (الألاجه) فنضفت اللحمة أكتر (آخر أنتكة أهو حد يقول الست قصرت) ... وتوك تيك تاك وهووووووووب وأحلى عزومة فيكي يامصر كانت معمولة محشي مشكل .. وهوبر .. وطبيخ .. وسلطات ... إلخ.

وبعد ما ضيوف الحج إنكشحوا ... راحتله براس عالية .. ومناخير مرفوعة .. وثقة بإن الواجب تم على أكمل وجه.

لكن للأسف رد الوالد كااااااااان فاجعة!!!!!! ...
الأكل ده كله مدخلش مزاجهم .. ليه يا عمونا فيه إيييييييييه؟؟
عشان اللحمة مفيهاش (سميييييييييين) ... ياااااااااااادي النيلة ... أتاري الضيوف ... من البلد.

إللي عايزة أقوله بعد الحدوته دي .. إن الواحد مهما عمل ونيته صافية بالخير مش هيعجب ولازم يطلعله ناس تظن بأفعاله النقص والسوء .. وهي لا تعلم كم من نوايا طيبة خلف أعماله وكم من مجهود أضناه لنيل رضاهم؟

إحنا مش هنعجب مهما عملنا ... عشان كده قررت وأنا بكامل قواي العقلية إني أشيل في الفريزر حتة (سمين) لزوم الزحلقة ... فمن لم يرضى عن اعمالنا .. سيحناله السمين ... وزحلقناه ...

-4-

* واستطاع الإعلام المصري ببراعة فائقة، توصيل الخبر بكل مصداقية، حتى أن المشاهد أصبح "وااااااثق" بأن ما يعرض على الشاشات "شغل عصابات" و"أيادي خفية" و"واحد لهلوب بن لهلوب واخد كورس في الفوتوشوب".

* وأخيرااا أصدرت وزارة الصحة مصل منشط للغباء، يؤخد لمتابعي القنوات الإخبارية ... وبرامج التوك شو.

* وغلاوة غاليينك يا شيخ غير اسم قناتك المحروسه، حرااام بردو "الفراعيين" كانو أصحاب عقل وحضارة.

* نجح من له يد وراء أحداث مصر التخريبية في تحقيق هدفه الأول والأساسي وهو التساؤل بشكل مرضي ومعدي "من يستحق من أطراف الإدعاءات التصديق والدعاء له بالخيرات؟؟؟، ومن يستحق منا أن نكذبه ونرجمه بوابل اللعنات؟؟؟".

-3-

* التوك توك .. اختراع يجي منه، لكن في بلاد "بتركب الأفيال" .. مش في بلاد "بتركب الهوا" (!!!).

* أصبح من "اللا معقول" .. أن يسعى الشخص لإيجاد فرصة عمل، في حين أصبح من "المعقول" .. أن يسعى مديرك وراء إقالتك (!!!).

* دوائر مغلقة .. ذات صلة، أذكر منها .. "دائرة الاتهام، دائرة الشك .. والدائرة الحمراء لإشارة روكسي" تفتح جميها بعد "كمين" تخرج منه بعد "إتاوة مدفوعة" .. أو "تراخيص مرفوعة" (!!!).

* زماااان كان في حاجة اسمها "سلاملك الحريم" وده (مكان) ساد "منع" دخول الرجال إليه.
دلوقتي في حاجة اسمها "سلام لك من الحريم" وده (فعل) ساد "لمنح" الرجال إذن الدخول (!!!).

* الله يسامحك يا "كادر" .. مانابني منك غير قلم رصاص وأستيكة .. وسؤال مـ "كادر" ني (!!!).



ملحوظة:
لتكبير الصورة اضغط عليها.

-2-

* على أول شارعنا .. لمة عيال .. ضحك وهزار .. قربت منهم .. قلت أشوف مالهم؟ .. طلع ولا حاجة .. مولعين في قطة (!!!).

 

* عفريتة قوي .. البنت دي .. مسكت قلم .. رسمت علم .. من غير ولا لون (!!!).

 

* زغاريد جاية من الدور الفوقاني .. وصويت كمان .. فتحنا البيبان .. نشوف جرى إيه؟ .. حماتين .. واحدة بنتها اطلقت .. والتانية ابنها طلق .. تفتكروا مين زغرد .. ومين صوت (!!!).

 

* حاجة غريبة .. تلات شبكات محمول .. وواحدة أرضي .. ويجي كام مية ألف سنترال .. هو إحنا ماعدش فينا غير لسان (!!!).

 

* نفسنا ناكل فراخ بتكاكي .. مش بتنهق .. ولما تدبح .. ما تطيرش (!!!).

 

* في قطر الصعيد .. النضافة الشخصية من المحظورات .. معاهم حق .. هيلاحقوا على تمن التذكرة .. ولا الشاور جل (!!!).

-1-

* أنسلك الخطى من أجل (الرحيل)؟ .. أم أننا نرحل لأجل (خطواتٍ جدد)؟.

* يستهلني (الحديث) فأذكر .. كيف كان (الصمت) خير حوار.

* أضع زينة (عرسي) مدندنة أمام المرآة .. فتلوح لي خيالات أغنية تتهته بها امرأة (عجوز).

* يقف العالم (ساعات وساعات) إجلالأ واحتراماً للعظماء كلما مروا أمامنا، هكذا البداية دائماً .. أما النهاية، فكلمات للعزاء والعالم يقف (دقيقة) حداد ناظراً إلى ساعته.